الأوراق القانونية المطلوبة في المدن الجديدة: دليلك قبل ما تشتري أو تستثمر

لما تيجي تستثمر أو تشتري وحدة عقارية في المدن الجديدة زي العاصمة الإدارية، التجمع الخامس، أو مدينة المستقبل، لازم تكون عارف إيه هي الأوراق القانونية اللي تضمن حقك. الموضوع مش مجرد عقد بيع وخلاص… في ورق أساسي لازم يبقى مع المطور العقاري وتتأكد إنك شفته بعينك.

1. سند ملكية الأرض

أول ورقة لازم تشوفها هي ملكية الأرض. هل الشركة المالكة عندها عقد ملكية واضح أو قرار تخصيص من هيئة المجتمعات العمرانية؟الورقة دي بتبين إن الأرض أصلًا تخص الشركة اللي بتبني عليها المشروع.

2. قرار تخصيص الأرض

غير الملكية، لازم يكون فيه قرار تخصيص رسمي من الهيئة بيوضح مساحة الأرض، والغرض من التخصيص (سكني – تجاري – إداري – طبي).

3. الترخيص

الترخيص هو المفتاح!من غير رخصة بناء المشروع يعتبر غير قانوني. لازم تشوف نسخة من الترخيص الصادر للمطور، واللي بيأكد إن كل حاجة ماشية وفقًا للقانون.

4. اعتماد المخططات (قرار الوزير)

دي خطوة مهمة جدًا، وهي إن المشروع يكون واخد اعتماد من الوزير أو الهيئة على الرسومات والمخططات.ببساطة: المشروع اللي من غير اعتماد ممكن يبقى معرّض لمشاكل مستقبلية.

5. السجل التجاري للشركة المطورة

اسأل دايمًا على السجل التجاري والبطاقة الضريبية الخاصة بالشركة المطورة. وجودهم بيأكد إنك بتتعامل مع كيان قانوني رسمي، مش شركة وهمية.

6. عقود البيع

العقد هو اللي بيربطك بالمطور.اتأكد إن العقد مكتوب فيه:

• بيانات الوحدة (المساحة – الدور – الفيو).

• السعر وطريقة الدفع.

• مواعيد الاستلام.

• غرامات التأخير لو حصل أي تأجيل.

7. إيصالات الدفع

كل دفعة بتدفعها لازم تاخد عليها إيصال رسمي مختوم. الإيصال هو إثباتك الوحيد عند أي نزاع.

8. عقود التشغيل أو الإدارة (لو موجودة)

في بعض المشاريع، خاصة التجارية أو الإدارية، بيكون فيه شركة تشغيل أو إدارة للوحدات (مول – إداري – طبي). وجود العقد ده بيحدد حقوقك كمستثمر وبيطمنك على إدارة المشروع بعد الاستلام.

نصايح سريعة قبل ما تمضي

• ماتستعجلش… اقرأ كل ورقة كويس.

• استعين بمستشار عقاري بمحامي متخصص لو مش فاهم التفاصيل.

• اتأكد إن اسم الشركة اللي في العقود هو نفس الاسم اللي في السجل التجاري.

• أي وعود شفهية لازم تبقى مكتوبة في العقد.

الخلاصة

الأوراق القانونية مش مجرد روتين، دي خط الأمان اللي بيحميك من أي مشكلة مستقبلية.قبل ما تدفع أي فلوس أو تمضي على أي عقد، لازم تتأكد إن كل المستندات دي موجودة وصحيحة.

استثمارك في المدن الجديدة فرصة كبيرة، بس الأمان القانوني أهم من أي عرض مغري.